ఖమ్మం బడులకు మహర్దశ.. వర్సిటీకి కొత్త దిశ. ప్రభుత్వ పాఠశాలల్లో నూతన భవనాలు, మరమ్మతులకు రూ.10.12 కోట్లు ఇవ్వండి..
ఎర్త్ సైన్సెస్ విశ్వవిద్యాలయానికి త్వరగా రెగ్యులర్ వీసీని నియమించాలి.. విద్యాశాఖ ముఖ్య కార్యదర్శి యోగితా రాణాకు మంత్రి తుమ్మల నాగేశ్వరరావు విజ్ఞప్తి..
D SITHA RAMULU, KHAMMAM ...Reporter
అక్షరం తెలుగు డైలీ - ప్రాంతీయ వార్తలు / ఖమ్మం జిల్లా : . ఖమ్మం/ స్టాఫ్ రిపోర్టర్ అక్టోబర్ 16( అక్షరం న్యూస్) హైదరాబాద్:ప్రభుత్వ విద్యారంగాన్ని బలోపేతం చేయడం, విద్యార్థులకు మెరుగైన విద్యావకాశాలు కల్పించడమే లక్ష్యంగా మంత్రి తుమ్మల నాగేశ్వరరావు చర్యలు చేపట్టారు. ఈ మేరకు శుక్రవారం సచివాలయంలో విద్యాశాఖ ముఖ్య కార్యదర్శి యోగితా రాణాతో మంత్రి సమావేశమయ్యారు. ఖమ్మం నియోజకవర్గ పరిధిలోని ప్రభుత్వ, జిల్లా పరిషత్ పాఠశాలల్లో నూతన భవనాల నిర్మాణం, మరమ్మతులు, మౌలిక సదుపాయాల కల్పనకు రూ.10.12 కోట్లు మంజూరు చేయాలని కోరారు. అలాగే కొత్తగూడెంలోని డాక్టర్ మన్మోహన్ సింగ్ ఎర్త్ సైన్సెస్ విశ్వవిద్యాలయానికి రెగ్యులర్ ఉపకులపతిని (వీసీ) త్వరితగతిన నియమించడంతో పాటు, విశ్వవిద్యాలయంలో నెలకొన్న సమస్యల పరిష్కారానికి చర్యలు తీసుకోవాలని విజ్ఞప్తి చేశారు. బడులకు భరోసా.. విద్యార్థులకు మెరుగైన వసతులు... ప్రభుత్వ పాఠశాలల్లో మౌలిక వసతుల కొరతను అధిగమించి, విద్యార్థులకు మెరుగైన అభ్యాస వాతావరణం కల్పించాల్సిన అవసరాన్ని మంత్రి వివరించారు. ఖమ్మం అర్బన్, రఘునాథపాలెం మండలాల పరిధిలోని ప్రభుత్వ, జిల్లా పరిషత్ పాఠశాలల్లో అభివృద్ధి పనుల కోసం రూ.10.12 కోట్లు కేటాయించాలని కోరారు. నూతన భవనాల నిర్మాణం, మరమ్మతులు, అవసరమైన విద్యా సదుపాయాల కల్పనతో పాటు డిజిటల్, ఇతర బోధనా పరికరాలను సమకూర్చడం ద్వారా ప్రభుత్వ బడులను మరింత బలోపేతం చేయవచ్చని పేర్కొన్నారు. ఈ పాఠశాలల్లో అధికశాతం బలహీనవర్గాలు, వెనుకబడిన తరగతులు, ఎస్సీ, ఎస్టీ కుటుంబాలకు చెందిన విద్యార్థులు చదువుతున్నారని తెలిపారు. ప్రభుత్వ బడుల్లో నాణ్యమైన విద్యతో పాటు మెరుగైన వసతులు అందుబాటులోకి వస్తే విద్యార్థుల అభ్యసన సామర్థ్యం పెరుగుతుందని, ప్రైవేటు విద్యాసంస్థలకు దీటుగా సర్కారీ పాఠశాలలను తీర్చిదిద్దేందుకు అవకాశం ఉంటుందని వివరించారు. అందుబాటులో ఉన్న నిధుల వనరుల ద్వారా ప్రతిపాదిత మొత్తాన్ని మంజూరు చేసి, పనులను ప్రాధాన్యంగా చేపట్టేందుకు చర్యలు తీసుకోవాలని కోరారు. 16 పాఠశాలలు.. 2,988 మంది విద్యార్థులకు ప్రయోజనం... ఖమ్మం అర్బన్ పరిధిలోని ఎనిమిది, రఘునాథపాలెం మండలంలోని మరో ఎనిమిది పాఠశాలలు కలిపి మొత్తం 16 బడులను అభివృద్ధి ప్రతిపాదనల్లో చేర్చారు. వీటిలో 2,988 మంది విద్యార్థులు చదువుతున్నారు. పాఠశాలల అవసరాలకు అనుగుణంగా మౌలిక వసతుల మెరుగుదల, విద్యా పరికరాల ఏర్పాటు తదితర పనులకు అంచనాలు రూపొందించారు. ఖమ్మం అర్బన్ పరిధిలో: ఎన్‌ఎస్‌సీ కాలనీ ప్రభుత్వ ఉన్నత పాఠశాల, పాండురంగాపురం జడ్పీ ఉన్నత పాఠశాల, రాజేంద్రనగర్ ఉన్నత పాఠశాల, జి.ఖమ్మం ఉన్నత పాఠశాల, బాలాజీనగర్ జడ్పీ ఉన్నత పాఠశాల, కుచవల్లి ప్రాథమిక పాఠశాల, బాలాపేట (వైఎస్సార్ కాలనీ) ఎంపీపీఎస్, రాజకవీధి ప్రాథమిక పాఠశాల ఉన్నాయి. రఘునాథపాలెం మండలంలో: వి.వెంకటాయపాలెం జడ్పీ ఉన్నత పాఠశాల, ఏర్లపూడి, వి.వెంకటాయపాలెం ఎంపీపీఎస్, పువ్వాడనగర్ ఎంపీపీఎస్, పాపటపల్లి, మంచుకొండ, కోయచలక, చిమ్మపూడి పాఠశాలలు ఉన్నాయి. ఈ ప్రతిపాదనలకు నిధులు మంజూరైతే ఆయా పాఠశాలల్లో వసతుల మెరుగుదలకు మార్గం సుగమం కానుంది. విద్యార్థులకు మెరుగైన తరగతి గదులు, అవసరమైన సదుపాయాలు అందుబాటులోకి రావడంతో ప్రభుత్వ విద్యాసంస్థలపై నమ్మకం మరింత పెరిగే అవకాశం ఉంది. వర్సిటీకి రెగ్యులర్ వీసీని నియమించాలి... కొత్తగూడెంలోని డాక్టర్ మన్మోహన్ సింగ్ ఎర్త్ సైన్సెస్ విశ్వవిద్యాలయ అభివృద్ధి, సజావైన నిర్వహణకు అవసరమైన చర్యలు తీసుకోవాలని మంత్రి తుమ్మల నాగేశ్వరరావు కోరారు. విశ్వవిద్యాలయానికి రెగ్యులర్ ఉపకులపతిని త్వరగా నియమించాలని విద్యాశాఖ ముఖ్య కార్యదర్శి యోగితా రాణాకు విజ్ఞప్తి చేశారు. విశ్వవిద్యాలయ పరిపాలన మరింత సమర్థవంతంగా సాగడంతో పాటు, అభివృద్ధి కార్యక్రమాలను వేగవంతం చేసేందుకు పూర్తిస్థాయి నాయకత్వం అవసరమని పేర్కొన్నారు. ఎర్త్ సైన్సెస్ రంగంలో విద్య, పరిశోధనలకు ప్రాధాన్యం కల్పించడంతో పాటు, విశ్వవిద్యాలయాన్ని ఉన్నత ప్రమాణాలతో అభివృద్ధి చేసేందుకు చర్యలు తీసుకోవాలని మంత్రి సూచించారు. భూ విజ్ఞాన శాస్త్రాలు, ఖనిజ వనరుల అన్వేషణ, పర్యావరణ అధ్యయనాలు వంటి అంశాల్లో పరిశోధనలకు ఈ విశ్వవిద్యాలయం ఉపయోగపడే అవకాశం ఉందని, అందుకు అవసరమైన విద్యా, పరిశోధనా వాతావరణాన్ని బలోపేతం చేయాల్సిన అవసరం ఉందని వివరించారు. విశ్వవిద్యాలయంలో పరిపాలనాపరమైన సమస్యలు, కనీస మౌలిక సదుపాయాల కొరత, ఉద్యోగులకు సంబంధించిన అంశాల పరిష్కారంపై దృష్టి సారించాలని కోరారు. సంస్థ కార్యకలాపాలు సజావుగా సాగేందుకు అవసరమైన వసతులను మెరుగుపరచడంతో పాటు, ఉద్యోగుల సమస్యలను పరిశీలించి తగిన చర్యలు తీసుకోవాలని సూచించారు. రెగ్యులర్ వీసీ నియామకంతో పరిపాలనా నిర్ణయాలు వేగవంతమై, విశ్వవిద్యాలయ అభివృద్ధికి అవసరమైన కార్యక్రమాలను సమర్థవంతంగా ముందుకు తీసుకెళ్లేందుకు అవకాశం ఉంటుందని పేర్కొన్నారు. విశ్వవిద్యాలయ నాన్‌టీచింగ్ ఎంప్లాయీస్ అసోసియేషన్ సెప్టెంబరు 17న సమర్పించిన వినతిపత్రాన్ని కూడా మంత్రి సంబంధిత లేఖకు జత చేశారు. అందులో ప్రస్తావించిన సమస్యలను పరిశీలించి, తగిన చర్యలు తీసుకోవాలని కోరారు. రెగ్యులర్ వీసీ నియామకంతో పాటు పరిపాలనా వ్యవస్థను బలోపేతం చేయడం, అవసరమైన వసతులు కల్పించడం ద్వారా విశ్వవిద్యాలయం అభివృద్ధికి దోహదపడాలని విజ్ఞప్తి చేశారు. ప్రభుత్వ పాఠశాలల్లో మౌలిక వసతుల మెరుగుదల నుంచి ఉన్నత విద్యాసంస్థల పరిపాలన బలోపేతం వరకు విద్యారంగానికి సంబంధించిన కీలక అంశాలను మంత్రి తుమ్మల నాగేశ్వరరావు ప్రభుత్వం దృష్టికి తీసుకెళ్లారు. పాఠశాలలకు నిధుల మంజూరు, విశ్వవిద్యాలయానికి రెగ్యులర్ వీసీ నియామకం, మౌలిక సదుపాయాల అభివృద్ధిపై సత్వర చర్యలు తీసుకోవాలని కోరారు.
.
.jpg)
7893003409
Editor : sk. Yakub pasha 7893003409
Aksharam Telugu Daily
మరిన్ని వార్తలు
.jpg)
2.jpg)
Developed By :
